ممكن

الطبعه الأولى عام 1996

حكاية كل يوم

في الصبح .. نشرب قهوتنا

في الضهر .. نحلم فين بيتنا

في الليل .. نكرّر قصتنا

مَاهي قهوتنا .. بنشربها فْ بيتنا

زيّ صحابنا

زيّ القعده .. حوالين حواديتنا

زي الحزن اللي بيسرق منّا

أفراح غنوتنا

في الليل نكرر قصتنا

ما هو لا زم نكرر

ونكركر

ونموت .. م الضحك

في العصر .. نحلم بالقصر

في المغرب .. نغرّب أسامينا

في القرب بعْدت مراسينا

من أفراحنا .. داوينا جراحنا

أصبح لينا .. كمان مطْرحنا

قمنا طرَحْنا

لاكن تاني

دون أن ندري جرحنا

مسحنا لون أسامينا

لذا حواديتنا .. بتكفّينا

في الليل نكرر قصتنا

ما هو لازم نكرر

ونكركر

ونموت م الضحك

وغريبه

بنضحك

يكشّر الخلق فينا

غُرَبا

كئنّه مش عالمنا

نسأل

يقولوا العيب دا .. فينا

واحنا وَفِينا

تاني لاقينا

سوا .. بعضينا

على بعضينا

غُرَبا

في وسط لمةْ .. أسامينا

نعمل مراكب مراسيلنا

من ورقةْ كراريسنا

تجينا موجه .. تلاعبنا

نغرق ما نعرف نلاعبها

ولا أيّ شط بترسي مراسينا

نسأل

يقولوا العيب دا .. فينا

واحنا وَفِينا ..

تاني لاقينا

سوا .. بعضينا

على بعضينا

غُرَبا

في وسط لمةْ .. أسامينا

وتاني غريبة!

مع كوبّايةْ الشاي الصبحيّه

قَريتُه ..

جُرنان الصبحيّه

إتنهِّدْت بجدّ

وسرحت لحدّ ما زاد النبض .. صرختْ

ما سمعنيش ولا حدّ

زيّ ما أكون ضايع على خارطةْ هذا العالم

وكئني طفل مالوش عَالم

مسروقه الضحكه ومش عارف ..

مين هوّه السارق

وكئني حُضن بدون عاشق

أو ضحكه من غير إنسان .. وهويّه

وكنسمه مالهاش عنوان الصبحيّه

وَنا ..

مع كوبايةْ الشاي الصبحيّه

قريتُه ..

جُرنان الصبحيّه

إتنهِّدْت بجدّ

وسرحت لحدّ .. ما زاد النبض .. صرختْ

ما سمعنيش ولا حدّ

والطقس

شبّاكي فْ أودتي

دايمًا بيطل

دايمًا على حيرتي

وتملِّي يهلّ كطفل بيصرخ في جميع الأوقات

لو حتى حكينا لُه

كل الحكايات

بيشوف الطقس في كل الأحوال:

بارد وبيغلي

لحظه ..

ضاعت ملايين الأطفال

أما الأبطال

هُمّا في كل بلاد العالم ..

هُمّا قتلةْ كل الأطفال

شايفين الطقس ف كل الأحوال:

بارد .. وبيغلي

باحبك

وسط المسروقات

والمفروشات

والمعروضات

في الرايحه وفي الجايات

وف كل حاجه من الحاجات

ما اعرفشي مالي ولا قلبي مالُه

دا عقلي حالُه .. حال

ومزاجي متغيّر ..

مش هوّه عال العال

مانا شفت الطقس فْ كل الأحوال:

بارد .. وبيغلي

وانفضّت الجلسة

وآديك يا قلبي .. فاضي

وغاوي تعيش قواضي

لكين فين القضيّه

وفين هُمّا الأعادي

عملنا محكمه فورًا

لكين فجأه

أعلن الحاجب

وهوه رافع الحاجب:

قاضي المحبه اختفى

وانفضّت الجلسه

ما احنا الدلع صايم

واحنا الوجع قادم

واحنا الفرَح دايم

وفْ لحظه فوضويّه

نتنسِّم الحريّه

تتبسِّم الحريّه

ما احنا بالتأكيد

مش ناس هفيّه

ولا قلب فيه تنهيد

ولا راس مطاطيّه

عملنا محكمه فورًا

لكين فجأه

أعلن الحاجب

وهوّه رافع الحاجب:

قاضي المحبّه اختفى

وانفضّت الجلسه

وآديك يا قلبي فاضي

وغاوي تعيش قواضي

والحل الأوسط

لا يزال

في الشرق الأوسط

الحل الأوسط والأبسط

نقتل .. نتقاتل .. ونقابل بعضينا مع بعضينا

نتعامل في مشاكل ومسائل بلغات الموت

مش بلغات الحب أو الدهشه

ولا حكايات

ولا .. كلمات أو ألوان في أي مكان .. غير الأحزان

وأنا مهما غنّيت اتكلّمت .. مش ممكن أسكت

في الشرق الأوسط

لا يزال

الحل الأوسط

نقتل .. نتقاتل

نتقابل

ولا نعرف مين احنا

ولا لون أسامينا

ولا فرحه في يوم

كانت بتقضّينا .. مع بعضينا

بندمّر لونك يا حقيقه

وبنمسح إسمك يا صديقه

عايشينها حريقه

بنطفيها بدمع الحريه

في الشرق الأوسط

لا يزال

الحل الأوسط

للأسف المدهش

لا زلنا بنكره بعضينا

وكمان .. أسامينا

مش عارف ليه

ومواطن

صهدان في عز البرد

بردان في عز الصهد

لاكن باحب الورد

يلبس هدوم إنسان

أنا زرعت الورد

بانده مفيش ولا ردّ

يا عالم في أي أرض

يفرح أمل إنسان

الحل دا مش حلِّي

أصبحت مواطن .. دولي

والعالم أكيد من حوْلي

بيدوّر على إنسان

وعنواني

عنوانك

موسم أفراح

ومباح

للورد يجيلك

يعزف لك حنيةْ فرحُه

بعدما طاب جرحُه فْ حضنك يسكن يرتاح

عنواني .. مش بلد الأحزان .. ولا شطّ شرود

عنواني .. على ضِلةْ رمشك حاسس بالدنيا براح

على خنجر صمتك موعود .. بوعود

على شاطئ بكره الطارح للغربه مطارح دفيانه ..

وفْ قلب حنون

عنواني

عنوانك

تايهين في بحار الحزن المجنون

ومباح

نتكلم بكره

في مواسم .. مليانه أفراح

عنواني

عنوانك

على شجر التوت المكسوف

على شجر الرمان اتبعترتي فْ لحظه يا أحزاني

مانا قلبي حصن .. ومكشوف

ونا بانسى من كُتر جناني

وابعت جواباتي

على ضِلةْ بكره المليان بالخوف

والوطن

كان ليا صاحب .. مالوش وطن وسعيد

وصاحب

ليه وطن .. وبعيد

كورال:

زرعونا حبوب

حصدونا سنابل

وكتبنا رسايل

ورق المحبوب

سِكّين ودبحنا

ورجعنا

عشاق يا وطن

كتير ..

نلقى الوطن عبقري

وساعات فقير شحّات

وساعات بضحكه .. سُكّري

ويعرف البسمات

ونا أصلي غاوي

أعيش أداوي

وأمسح كتير دمعات

وابعد كتير آهات

عن الوطن

كبّرناه .. وصغّرنا

كدّبنا .. وصدقنا

عشقناه .. ما فرحنا

وشبعنا عزفًا .. ع الوتر

بكلام كتير .. زي المطر

يروي الوطن

يمسح وطن

يرسم وطن

آدي وطن

زرعونا حبوب

حصدونا سنابل

وكتبنا رسايل

ورق المحبوب

سِكّين ودبحنا

ورجعنا

عشاق يا وطن

أحلامي لسه

في حضن شارع

وفرْحي أمسي ..

كئنه ضايع

وشفايفي غنّت ..

حُزن المدامع

وقمرنا برضُه

طالع لُه شامه

لاكن السلامه

وشمَه في خدُّه

فيها اللي أدُّه

مش أدّ .. وردُه ..

لاكنّ حلمي

مفروش في أرضُه

فرحةْ وطن

آدي وطن

زرعونا حبوب

حصدونا سنابل

وكتبنا رسايل

ورق المحبوب

سِكّين ودبحنا

ورجعنا

عشاق يا وطن

سلّمت أمري

لاكن ما اسلّم

سلّمت سيدي

واللي بإيدي

باحبّ أحلم

كئن سيدي ..

هوّه حبيبي

هذا الوطن

ساعات يبقى الوطن

حبةْ نجوم

وساعات

صُحبه من الهموم

وساعات

لابس الموضه ع الآخر

وساعات

على أدّ حالُه

وأخاف عليه م الخوف

ألقاه حزين مكسوف

على تختةْ التاريخ

آدي .. وطن

مين اشترى

مين اللي باع ..

مين اللي ضيّع

عُمري فْ ضياع

مين اللي باني

أحلى المعاني

زيّ المباني

فيها الدفا ..

أحلى سَكَن

هوه أكيد ..

عاشق وطن

زرعونا حبوب

حصدونا سنابل

وكتبنا رسايل

ورق المحبوب

سِكّين ودبحنا

ورجعنا

عشاق يا وطن

سقفه خليجي

ح تبل ريجي

الكل عارف ..

إنّي ساقيكي

طعم المعاني

لمّأ باعاني ..

وخز الوجع

وانتي فراشه

زيّ البعاشه

جايّه فْ دلع

لاكنّ حلمي

أكبر لأنّي

عاشق وطن

آدي .. وطن

إشمعنَى حبي للوطن

ما تسألنيش

إشمعنَى خُوفي ع الوطن

سؤال ما يتقالّيش

لأنّي أنا

سدر الوطن

ضهر الوطن

عين الوطن

عاشق الوطن

زرعونا حبوب

حصدونا سنابل

وكتبنا رسايل

ورق المحبوب

سِكّين ودبحنا

ورجعنا

عشاق يا وطن

وحسابات

زائد

ناقص

فائض

وارث

وارد

حارس

ماهي هيّا حياتنا بالناقص

وساعات زائد

تضرب .. ما تضرب

تطرح .. ما تطرح

ما حاولتش أجرح

لكنّي .. باسمح أنضرب

مع رقم ما حبيتوش

واكمنّي بارفض انطرح

لأني عنقود الفرح

أنا أي حزن ما باعرفوش

وبحاول أتخفّى

لاكن

عمري بيتصفّى

ولما . ساعات باحلم .. أغفَى

بالقى الزائد

زوّدها وبيقتل همّي

والقى الناقص

صاحب نقصني

غرّقني

في حكاية همّي

والتوهة

يا قلبي يا مجنون .. جنون الشتا المهموم

إتمرجح على أدّك

شويّه في بحرك

حاول في مرّه تعوم

لو بحر مش بحرك

شوفْ لَكْ قوام مركب

واسْكُن بحور أدّك

ليه ترمي عليّا اللوم

حلوْ .. وأدّ .. أدّ .. أدّ

أدّ .. الجذور في الأرض

أغلى من عطور الورد

لكن نصيحتي ليك:

شوفْ لَكْ خيال ع الأدّ

بطّل في وهم تعوم

واسكن بحور أدّك

ليه ترمي عليا اللوم

غيّرت حتى الجوّ

طيّرت حلمي فْ لوْ

ضيّعت طعم الضوّ

عيبَه تصدّق وهم

واحلم بحياة تحلوّ

بطّل في وهم تعوم

واسكن بحور أدّك

ليه ترمي عليا اللوم

يا قلبي يا مجنون .. جنون الشتا المهموم

والتاريخ

ع التخته

كتبوا التواريخ

ع التخته

مسحوا التواريخ

الدنيا تاريخ

والقلب تاريخ

والسنه كراريس مليانه تاريخ

في قلبي

مدبوح يا تاريخ

من حزني

مهموم بتاريخ

أنا عاشق ..

فرّحت زمنْ

أنا عاشق ..

غنّيوتي شجن

من قلبي بارسم تواريخ

يرسمني قلم

يرفعني علم

ما اعرفشي ندم

ولا اتوه .. في تاريخ

من أول ورده .. وحلم ..

حلم فْ كراستي

للتعب الحلو والمرّ ..

مَرّ مع حكايتي

أنا بابدأ .. وانهيها روايتي

أنا رافض كل التواريخ

أنا باعشق بنوتَه .. وْتُوتَه

ولا خلصت مرّه الحدوتَه

وكئنّي سلطان في زماني

والفرحه في حضني مبسوطه

ونا .. رافض كل التواريخ

ولو

لوْ ..

لو كنت ما قابلتكيش

ما عرفتكيش

لو كنتِ ما اتكلمتيش

كنت سكت، سكنت عيون الحزن .. صرخت

وساعتها الجن

كان ح يجنّ ولا يعرفنيش

لوْ ..

أنا كنت ح أبقى ساكن مساكن حزني فوق دفَا الكراسي

وكنت ح أقعد على صفحة كُرّاسي

أفسّر الحلم الضايع

في شوارع راسِي

لوْ ..

أنا كنت ح أبقى قمر حيران ع الشجر

باهت على الشطآن

و .. كنت كمان

ح أبقى فْ منتهى حنان لحظةْ الرقّه

زيّ الدموع الفقيره

في عيون فقير

وزيّ ناس بلا سيرَه ..

أو مسيره

وزيّ فرحَه خايفه عيون أمير

لوْ ..

كنت ح أبقى نجم تايه على خدود البلاد

وفرْح عاشق ..

بلا عشاق

زيّ ضيف ..

جايّ من قصص الفراق .. بدون ميعاد

ولا كنت ح اعرف طعم اللقا .. وقت اللقا

ولا ..

طعم الفراق .. وقت الفراق

لوْ ..

ومركب ورق

تحت شجرةْ منجه

وصوت كمنجه

كان القمر طالع

كان نفسي أسافرْ لُه

لاكنّه

إكمنّه قمر

عاشق قمر

تاه منّي وما لقيتهوش

نِزِل القمر للبحر يشرب المواويل

ولمّا شفتُه ما عرفتوش

عملت مركب من ورق

وقتلت أدوّر ع القمر

خَدْني المركب للقلق

وموج دموعُه كالمطر

ونا وانتَ يا عصفور الحلم

في الحلم

ماشيين تايهين

في بحور الحيره وعارفين ..

كده على فين ..

على فين .. رايحين:

الصدق .. ورق

الكدب .. ورق

الحب .. ورق

والدنيا .. ورق

نلعبها .. ورق

ترمينا .. ورق

ونشرة الأخبار

في نشرةْ أخبار الليله

عُشّاق انهاروا

أحلام انهارت

هُمّا اللي اختاروا ..

يسكنوا في بيوت

مافيهاش

أفراح ضُليله

وقلوب احتارت

ضاعت أحلام الفرحه في عيون العيله

نشرةْ أخبار الليله

المانشيت رئيسي

لاكنّ .. مش هوّه رئيسي

لوْ كان الصدق فْ غناوينا

كُنّا خطّينا الصعب وصلنا لشطوط أمانينا

لاكن طرنا من غير جناحات

تايهه فْ شفايفنا أفراحنا .. وسْط جراحنا ..

تايهه أحلى الحكايات

الليله .. الليله

في نشرةْ أخبار الليله

من حَقّي أرفض مش أفْرِض

من حقي أحلم .. وأتبغدد

واسكن ليله

أبعد عن حزن العيله

نشرةْ أخبار امبارح

كانت عن فرْحي الطارح

كانت عن حبةْ عشاق مجانين

زرعوا الفرحه فدادين .. لكتير ملايين

لاكنْ مين

مين هوّه العاقل وسط المجانين

الليله

نشرةْ أخبار الليله

المانشيت رئيسي

لاكنْ من هوّه رئيسي

وساعة الفرح

بلاد الحزن لا يمكن تفرّحني

ولا يوم ح تغريني

عيون الفرح لا يمكن تجرّحني

وطول العمر ترويني

وقلبي ساقيه بتدور

بتروي الضحكه والرقه

وأنا وحبيبي يا ليل

عشنا الحياه بلا فرقه

دي ساعةْ فرْح تكفيني

أنا وحبيبي يا ليل

لفيت بلاد غُرَبا

عشت الميعاد غُربَه

عشقت اللمّه والصُحبَه

وطعم الفرحه يغريني

بلاد الحزن لا يمكن تفرحني

ولا يوم ح تغريني

دي ساعةْ فرْح تكفيني

أنا وحبيبي يا ليل

يا آهةْ ناي يا ضحكه في الفضا

دا عاشق قلبي ليكي وارتضا

لا عمرك مرّه تشكيني

وساعة القرب ترضيني

بلاد الحزن لا يمكن تفرّحني

ولا يوم ح تغريني

والميلاد

أبواب

تنفتح أبواب

تنقفل أبواب

إيدين ..

بتكتب بدايه

إيدين ..

بتكتب نهايه

وعيون على الأبواب

فينك ح تهرب يا شوقنا

دا الفرق ع الباب

ندفا في طريق حزننا

نبرد في سكة فرحنا

ولأننا خايفين

خايفين كثير على بعضنا

لا بد نسبق ضلنا

لأيّ شط أمان

ننسى عشان عمرنا

يبقى له ركن في عيد ميلاد

نهرب عشان إسمنا