حلم عصفور في القفص (ديوان للأطفال)

حلم عصفور في القفص

(ديوان للأطفال)

صيّاد سمك طيّب

يا سَمك أشكال والوان

إطلعلي وارْقُصْلي كمان

أنا بناديلك .. ونا باضْحكلك

أنا صدّقني مش رايح اكلك

نِفسي أتصوّر صوره ويّاك

لمّا راح ألعب كُوره معاك

كره تبادلني الشوق أشواق

لو تعاندني ح اقول أهواك

نركب مرّه يا ريت أتوبيس

قلبُه مزقطط بالنسانيس

بعد الرحله آخدكُو لبيتي

بسّ مراتي ح تِشْبَط فيكُو

راح تتخيّل

وانتو بتبكوا ف قلبي الطاسَه

أنا ح اتوجّع .. مش ح استحمل

إنّي أشوفكو

أكْلَه هَنِيّه لأنِّي صاحبكو

حلم عصفور في القفص

باحلم أشُوف الشمسْ

باحلم أغنِّي من غير همسْ

باحلم أطير وارفرف

ولا يِمنعني سحاب أو سقف

باحلم أزقزق

ونا باتشوّق

يرقص قلبي

لمّا الحلم حقيقي يتحقّق

لمّا ح اقابل واحد صاحبي

بعد غيابي يقول: سلامات

وانسى إنّي كنت ف سجن

عشت شهور في الحبس ح جِنّ

مين يفتح لي الباب

مين يا صحابي .. مين يا احباب

نفسي أطير واقابل أهلي

قبل ما يسكت قلبي وينسَى

ينسى ازّاي للأهل يحِنّ

شارع بالألوان

أول مرّه وعيت للشارع

شُفته جنينة عربيّات

زحمه كتير والشارع واسع

ناس ضحكُولي

وابتسمُولي

وشفت البعض مكشّر خالص

شفت البعض كمان مش حاسِس

ولا مستمتع بالألوان

شُفت الأبيض

شُفت الأسمر

شُفت الأشقر

كل الناس لابسين ألوان

لاكن الحق

أنا محتاره

شُفت اشاره

خضرا ف مرّه .. قُمت مشيت

صفرا ف مرّه .. إستنّيت

حمرا ف مرّه .. لم عدِّيت

صحّ صحيح دي المعلومه

أنا خدتها من بابا وماما

ثم مشيت ونا باضحك .. باضحك

كان الشارع كله ملوّن

شُفته بيرقص في الألوان

بنت جيرانّا

من شبّاك أودتي

كنت بحاول أطُلّْ

على عود الفُل اللي مفرّع

على بيت بنت جيرانّا

كان نفسي أتقرّب واسألها

عن أحوالها

لاكن هيّا

كانت أجرأْ منّي

سألتني:

إيه معنى تاريخنا لو ما اتعلمناش

م اللي كتبوه كُتابنا

زي العم نجيب محفوظ

وقاسم أمين

والرافعي .. ورفاعه الطهطاوي وطه حسين

والمازني ومحمد عبده، وغيرهم ياما كتير

إيه معنى حياتنا لو ما اتعلمناش؟!

راح نعمل إيه؟!

راح تفضل طالل م الشبّاك

تايه بين هنا وهناك

والكُلّ سابقنا

القلب الأبيض

من كُتر العَبَطْ

دايمًا بقُول كلام غلطْ

مثلاً بقول: ما يهمّنيش

ونا مفيش غيري أنا ..

ويعيش أنا

زيِّي ما تلاقيش

ردِّت فراشه مزوّقه

وعصافير كتير مزقزقه

وقالولي: لأ .. غلط

كُلنا بنحب بعضنا

بنرسم وشُوشنا

ونكتب إسمنا

لأنّ قلبنا

أبيض بلون الحليب

واللي قلبه بلون الحليب

عُمره ما يقول كلام غلط

حقوق الحيوانات

قالوا وكتبوا ونادوا

بحقوق الإنسان

واحْنا الحيوانات

ما بنعرفشي كتابه .. ولا بنقول بيانات

بسّ سمعنا البني آدمين

قالوا دفاعًا عنّا

ياما كتير حكايات

واحنا جميع الحيوانات

لا بنتناقش

ولا بنقدّم .. إعتراضات

في دول العالم كلُّه

الإنسان الأشقر .. والأصفر

والأبيض والأسمر

لِيهُم ياما حقوق

واحنا كمان الحيوانات

والزرع

لينا برضُه حقوق

ما احنا جميعًا على كوكب واحد

بنقول للإنسان: يا إنسان .. جاهد

دافع عن حقك وما تنساش

إنّ حمايتك لينا

هيّا حماية البيئه من حوالينا

وحمايه أكيده لنفسك

أنا مش أبوكو!!

ديك بيصيح

قال بصحيح

وكئنّه ف ثوره للتصحيح

قال أنا كُوكو .. كوكو كوكو

حلو أنا كوكو

حلو أنا أحلى فصيح

طبعًا .. طبعًا .. كتَّر خيري

كئنّي أبوكو

كده على صوتي صحيتوا يا ناس

كوكو .. كوكو كوكو .. وَديكو رايحين إلى أعمالكم

والأولاد رايحين مدارسهم

كوكو .. كوكو كوكو

وابتسامتهم فوق شفايفهم

كوكو .. كوكو كوكو

أنا مش أبوكو

أنا بصحيح

ديك بيصيح

أنا .. أنا أشْبِه لحظه أبوكو

لمّا بينده ويصحّيكو

حكاية كل يوم

الشمس بتطلع كل يوم الصبح

وشّها مدوّر ودافي

خدّها منوّر بفرْح

يضحك لها وشّ بنت

زي ما تكون واقفه ويّاها تتصوّر

والشمس تُغرب كل يوم المغرب

يِحزن الزرع اللي طالع يشبّ وصغيّر

كل يوم الشمس تطلع

أروُح لمدرستي

أقرا الكتب وأكتب .. وأرسم في كراستي

كل يوم الشمس تُغرب

أرجع لبيتنا

ألعب مع اخواتي

بعدها أوضّب حاجاتي كلّها

عشان الصبح بدري

أصحى واقُوم

أرُوح لمدرستي

والشمس بتطلع كل يوم.

بغبغان

أنا حكاويكُو

أنا باشْكيكُو

بسّ لنفسي .. أنا باشكيكو

أضحك .. أكركر .. أثرثر

مش متصوّر إني راح أحكي كده زيِّيكو

واقف أتسلَّى

عايز أنسَى

إني حبيس في القفص السلك

إني ف دنيا

سرقت منِّي

طعم الفرحه والحريه

حمار .. بيغنّي لنفسه!

أنا الحمار

دايمًا محتار

ولا بإيدي

أيوه يا سيدي

صعب أختار

ونا مُستسلم

ونا باتبسِّم

لمّا الكل نادوني : يا حمار .. إنت حمار

حكموا عليّا

من أُذنيّا

إنّ أنا تَنْبَل

وساعات أهبل

حتّى القرد ف عينهم أجمل

قلت لنفسي .. ده ما يهمِّشْ

أنا راح أمارس بس هوايتي

كده أسترخي

أريَّح مُخّي

قولوا عليّا مهما تقولوا

بسّ حقيقي

أنا حيوان قُدامكو مُطيع

أصْلي لأنّي عايز أعيش

ونا مش ح اطلب حقِّي ف يوم

ولا راح أقول إدُّوني بقشيش

كلّ منايا

بسّ أعيش

في وقت الحرب

من غير ما أعرفُه

من غير ما يعرفني

سَدِّد إلى سِدري رصاصه

ونا دي الوقت باموت

باموت

أنا بصراحه زعلت شويّه

وسألت .. واستغربت

إزّاي

طاوِع قلبُه .. وقتلني

ونا لا قابلته

ولا هوّه قابلني

غريبه الإنسان في الحرب

وغريبه الإنسان في الحب

في الحرب .. أعمى

في الحب .. أعمى

برواز صوره

أنا برواز

وشِّي قزاز

لمّا سألني جاري الكرسي ف أودة المكتب:

مالك ثابت مش هزّاز !!

قُمت جاوبته بطيبه وحُب:

أنا جوّايا منظر شارع

مليان زحمه وعربيّات

قاعد أتفرّج

واسمع منهم

من غير ما أمشي أو أحتار

ونا متعلّق في المسمار

أقلام ملوّنه بتحلم

كل يوم

فوق المكتب جنب الكراريس

أقلام أشكال وأحجام

بيحلمُوا

كل يوم أحلام

بيحلمُوا

يركبوا أتوبيس

بيحلمُوا

يمسكوا فوانيس

أو يتمشّوا ويهِشّوا العصافير

بيحلمُوا

يتقابلوا ويّا ناس

يسمعوا م الناس حكايات

بيحلمُوا

يرسموا فراشات

ونسمه حلوه معاها تطير

بيحلمُوا

زي الأولاد والبنات بالفرحه يوم العيد

والبالونات اللي بترقص باليهات في الإيد

لكن

إزّاي تتحقّق أحلامهم

من غير إيد الإنسان

القدس

ينساني دراعي الشمال

ينساني دراعي اليمين

لو نسيت القدس

تنساني عينيّا لِـ تْنين

تنساني أفراح السنين

لو نسيت القدس

ينساني الليل والنهار

وضِلّة الديار

لو نسيت القدس

تنساني بسمة الأولاد

وطرحه مزوّقه راس البنات

تنساني الشوارع والبيوت والحُب

لو نسيت القدس

حلم النهارده وبكره

النهارده

كل شيء أصبح لُه معنى

كلمة نهار

ضحكه مزقزقه ومزوّقه فوق حيطان الدار

سمكه مفرفِشَه بترقص على الأنهار

ضحكه منعنشه وِسط الجناين

عدِّت بحار .. وبحار

طاطت لها بعدَها رُوس الجبال

مفيش مُحال

أصبح لُه معنى

كلبي الكانيش

أنا عندي كلب كانيش

ما يحبِّش البقشيش

ويحبّ لمّا ألاعبُه

ما قُولشي لحمَه مفيش

واكمنّ لأنّي صاحبُه

يقولّلي: إضحك .. عِيش

لو تخرج فُسحه خُدني

لوحدي ما تسبنيش

لو حدّ ح يعاكسني

خلِّيه ما يزعجنيش

وانت يا صاحبي اسمعني

لو خايف قول لخوفك

رُوح يا خوف ما تجيش

واضحك .. إضحك .. إضحك

لازم يا صاحبي تعيش

حلوه الحياه

ما أحلى الحياه .. ما أحلى الحياه

ما أحلى الحياه ما نقولشي آه

والحلو نسمع

كلام بيزرع

أفراح في دار

واحْنا بنحكي

عن درس عربي

بيقول دا شعبي

عمرُه ما يشكي

غير بسّ يحكي

عن انتصار

ما أحلى الحياه والشمس طالعه

والديك بيدّن

من قلبُه صبّح على النهار

بنقولّه: أهلاً

والورد لابس

أحلى الملابس

زيِّينا واحْنا

رايحين بهِمّه

على المدارس

تلميذ شاطر

رِنّ يا جرس مدرستي